அந்தப் பதுமையானது மூலிகை இரகசியங்கள், உயிரின் தோற்றம், அது உடல் எடுக்கும் விதம், அந்த உடலில் அது படும் துன்பம் ஆகிய நிலைகளைத் தெளிவாக உணர்த்தியது. அதைக் கேட்டு ஆச்சரியத்தில் இருக்கும் போதே பதுமை மறைந்தும்விட்டது.போகர், காலாங்கி நாதரை வணங்கி மலைகளில் உள்ள பல தாது வகைகளை தேடி கண்டுகொண்டார். அதைக் கொண்டு பல காய கற்பங்களை செய்து அதனை தானே உண்டு பார்த்து அதன் பலன்களையும் அடைந்தார். இதனால் அவரது தேகம் மிகவும் திடமாகியது. மேலும் வானவெளியில் பறப்பது, நீர்மேல் நடப்பது போன்ற செயல்பாடுகள் எல்லாம் அவருக்கு மிக மிக சாதாரணமான செயல் ஆகியது. இதனால் போகருக்கு சிறிது கர்வம் துளிர்த்து விட்டது. துரோணருக்கு ஓர் ஏகலைவன் போல தானும் குருவை வணங்கி அந்த அருளாலேயே பல தாதுக்களை கண்டறிந்து விட்டேன் என்ற எண்ணத்தில், உண்மையிலேயே காலங்கிநாதருக்கு சீடர்கள் இருந்திருந்தால் அவர்கள் கூட இப்படி எல்லாம் அறிந்திருக்க மாட்டார்கள் என்றெல்லாம் நினைக்கத் தொடங்கிவிட்டார். இதனால் அந்த மலைத்தளத்தில் பணிவாக பார்த்துப் பார்த்து நடந்தவர் நெஞ்சு நிமிர்த்தி நடக்க ஆரம்பித்தார். மேருவிலும், இமையத்திலும் சூட்சும வடிவில் பலநூறு சித்த புருஷர்கள் தவமியற்றி வந்தனர். அவர்களில் பலரது தவம் போகரின் கர்வமான நடையால் கலைந்தது. அவர்கள் கண்விழித்ததோடு போகருக்கும் காட்சியளித்தனர். அதனைக் கண்டு திடுக்கிட்ட போகரிடம் நாங்கள் காலங்கி நாதரின் மாணவர்கள் பலப்பல யுகங்களாக எங்களை மறந்து தவம் செய்தபடி இருக்கிறோம் என்றார்கள். அத்தனையும் சில நாட்கள் கடந்தது போலத்தான் இருக்கிறது என்று அவர்கள் கூறவே போகருக்கு அது அதிர்ச்சியுடன் கூடிய ஆச்சரியமான செய்தியானது. அப்படியானால், அவர்கள் செய்யும் தவம் எவ்வளவு பெரிய விஷயமாக கொண்டிருக்க வேண்டும் என்றும் தோன்றியது.அந்த நொடி தான் கற்ற வித்தை எல்லாம் மிக அற்பமானது என்கிற எண்ணம் ஏற்பட்டு அவரது கர்வமும் அடங்கியது. அதை அறிந்த சித்த புருஷர்கள் போகருக்கு பல சித்த இரகசியங்களை போதித்தார்கள்.இறந்தவர்களை பிழைக்க வைக்கும் சஞ்சீவினி மந்திரவித்தையைக் கற்றுத் தருமாறு கேட்டார்.’தகுதியுள்ளவர்களுக்கு காயகல்ப முறையைச் சொல்லிக்கொடு’. ‘அவர்களை நீண்ட காலம் வாழவை’. ‘மரணமடைந்தவர்களுக்காகவும், மரணத்திற்காகவும் மனதைக் குழப்பிக் கொள்ளாதே’ என்று அவர்கள் அறிவுரை கூறினர். அதுவரையில் போகர் அறிந்திராத பலவிதமான காயகல்ப முறைகளையும் கற்றுக் கொடுத்து பின்னர் மறைந்தனர்.